شرح مفصل عن الامتحان الخارجي التمهيدي والوزاري للراغبين بالتقديم عليها في العام الدراسي الحالي

اهلاً بكم في موقع ومدونة احمد الداوودي في اخبار قسم التعليم التربوي ..

شرح الامتحانات الخارجية وكيفية التقديم عليها والاجتياز

شرح تفصيلي عن الامتحان الخارجي

نبذه عن الامتحان الخارجي : هو ان تدرس بالبيت بدون دوام بالمدرسة ومن تقدم خارجي لازم تمتحن امتحانين حتى تحصل الشهاده:
1️⃣ الامتحان التمهيدي.
2️⃣ الامتحان الوزاري.

📌 الامتحان التمهيدي: يصير بشهر 2 ويكون الامتحان بين 2/2 - 2/5 .. يعني ببداية الشهر و الامتحانات متتاليه بدون عطلة بينهن ، ومطلوب منك الكتاب كله من الجلاد للجلاد عدا الحذوفات الي نشرناها الكم..

📌 الامتحان الوزاري: تمتحن وزاري ويه طلاب المدارس بنفس الاسئله، و الكم نفس حقوقهم دور اول و ثاني و ثالث و ... وعاشر هم اذا نطوهم ،و درجة الناجح دور اول هم ينطوها الكم اذا نجحتوا دور اول (اضافة درجة على المعدل) , وبالوزاري الدرجات الحرجة الي ينطوها تشمل الكل طلاب المدارس والخارجي.

اهم النقاط الي تخص الامتحان الخارجي حتى تكون عندك فكره عامه:

1- الخارجي يقبل الطالب بعمر 18 سنه فما فوق حتى لو عمره 100 سنه المهم اكبر من 18 سنه، و هالكلام يخص طلبة السادس ابتدائي و الثالث متوسط والسادس اعدادي .

2- بالنسبه للنجاح من الامتحان التمهيدي كم ادرس انجح حتى ادخل وزاري ؟

🔶طلاب السادس الابتدائي عدكم 6 مواد :- (عربي، انكليزي، رياضيات، علوم، اسلاميه، اجتماعيات)
• الدخول بالامتحان التمهيدي ب2 يعني تنجح باربع دروس وترسب بدرسين مؤهل للامتحان الوزاري.

🔶طلاب الثالث متوسط عدكم 8 مواد :- (اسلاميه، عربي، انكليزي، رياضيات، احياء كيمياء، فيزياء، اجتماعيات)
• الدخول بالامتحان التمهيدي ب3 مواد يعني اذا تنجح بخمسة مواد وترسب بثلاثة مواد تتاهل للامتحان الوزاري.

🔶طلاب السادس الاعدادي عدكم 7 مواد :- (العلمي والادبي)
• الدخول بالامتحان التمهيدي ب3 مواد يعني اذا تنجح باربعة مواد وترسب بثلاثة تتاهل للامتحان الوزاري.

بالنسبة لقرار 10 درجات هل يشمل طلبة الخارجي ؟
هذا القرار خاص بالطلاب المنتظمين (طلاب المدارس) وما يشمل طلاب الخارجي…..
الخارجي مشمولين بقرار رفع الدرجات الحرجة يعني اذا وصلت الدرجة مالتك بالامتحان ( 45 ، 46 ، 47 ، 48 ، 49 ،) تنرفع الى (50).

الاكثر يستفاد ويطبق هاي النصيحه : بالامتحان التمهيدي تمتحنون فقط المواد الي تأهلكم للنجاح والدخول للوزاري عادي و تدرسون باقي المواد وره التمهيدي , وميحتاج اذا ما رحت تمتحن اجازة ولا اي اجراء مجرد تكمل نومتك بالبيت وما تروح للامتحان , وماكو اي ظلم لطلاب الخارجي بالتصحيح كل واحد ياخذ استحقاقه ودرجته.

3- الطالب الخارجي شرط يترك 3 سنوات بين مرحلة واخرى (سادس ابتدائي ثالث متوسط سادس اعدادي)، يعني اذا نجحت من الثالث متوسط بالامتحان الخارجي لازم تنتظر 3 سنوات حتى تقدم على السادس.
عدا الي عمره 28 وفوك …. هنا يحق اله يقدم بدون سنوات انتظار يعني إذا نجح من صف يحق يقدم على الصف الي بعده بدون سنوات انتظار.

4- طلاب الخارجي ينقبلون طب و هندسه و كلشي حالهم حال الصباحي اهم شي المواليد مقبوله.

5- الي ينجح من السادس بعمر 24 سنه فأقل ينقبل كلية صباحي حسب معدله، وبعمر 25 فما فوق ينقبل كلية مسائي او كليه اهلية.

6- اليدرس كلية او متخرج من الكليه و الموظف و يدرس معهد .. يكدرون يقدمون خارجي.

7- اليرسب بالخارجي يصير يقدم مره ومرتين و 3 و 4 ... و بسنوات متتاليه بدون ترك.

8- الي ينجح من الثالث بالخارجي يكدر يسجل بمدرسة و يكمل الاعداديه بالمدرسه اذا عمره مقبول .

9- الراسب بصف اول متوسط او رابع اعدادي يترك 3 سنوات يلا ينقبل خارجي.

10- الراسب بالثاني متوسط او الخامس اعدادي يترك سنتين يلا ينقبل خارجي.

11- الناجح من اول متوسط او الرابع اعدادي يترك سنتين.

12- الناجح من الثاني متوسط و الخامس اعدادي يترك سنه.

13- الراسب سنه وحده بصف ثالث او بصف سادس يترك سنه او يرسب سنتين او يتحول مسائي يلا يحقله خارجي.

14- الراسب سنتين او اكثر بصف سادس ينقبل خارجي ،
وطلاب السادس الراسبين بالمسائي انتم تقدمون خارجي بدون ترك

15- الراسب بصف رابع او خامس او سادس (اعدادي) و تتوفر عنده شروط القبول بالامتحان الخارجي يحقله يقدم ع نفس الفرع و يحقله يغير فرعه المهم م ناجح من السادس.

16- الناجح من السادس إعدادي يحقله يقدم خارجي بدون ترك بشرط يغير الفرع الي نجح منه و اذا اكو خريج من الفرع العلمي عام ، يحقله يقدم ع كل الفروع بس بعض مديريات تفرض عليهم يقدمون ادبي.